1917 ençe yıldagı Rus ihtilalennän soñ Yırak Şarektage Tatar möhacirlereneñ sanı Kazan, Ufa şähärläre belän Penza yaklarınnan kilgännär belän kübäygän. İhtilaldän äwwäl korılgan Harbin häm Hailar Oyışmaları zuraygan. Mukden, Tientsin, Shanghai, Tokyo, Kobe, Nagoya häm Seoulda yaña oyışmalar korılgan. Halkıbız balalarınıñ kiläcägen uylap, alarnıñ üz Tatar telebezdä belem alıp dinebezne häm mädäniyätebezne saklap kaluları öçen, mäscet häm mädräsälär salgannar. Läkin, ozın yıllar bu cirlärdä yäşägännän soñ, İkençe Bötendönya sugışınıñ betüe belän almaşıngan säyäsät näticäsendä halkıbız tagın ber tapkır hicrät itärgä mäcbür bulgan. Halkıbıznıñ kübese yä Törkiyägä, yä Amerikaga küçep kitkän.
San Fransisko tiräsenä kilep citkän Tatarlarnıñ sanı, Kaliforniyadagı başka millätlär arasında az bulsa da, alar Tatarlıknı, yagni telebezne, dinebezne häm ğoref-ğadätlärebezne saklap kalu öçen räsmi ber berläşmä korırga karar birgännär. 1960 ınçı yılnıñ 5 ençe ayınıñ 15 endä 30 keşe Burlingame’däge “Odd Fellows Hall” binasında ciyılgan. Bu berençe räsmi ciyılışta halkıbıznıñ kiläcäge öçen Amerikan Turko-Tatar Berläşmäsen korgannar, mütäwälli häyäten saylagannar häm berläşmäneñ kağıydälären kararlaştırgannar.
Berençe yıllarda ATTA ciyılışları törle äğzalarnıñ öylärendä uzdırılgan, läkin äğzalarnıñ sanı arta bargaç ber mähällä binası kiräk digän karar birelgän. Bu binanıñ ciyılışlarga gına tügel, şulay uk balalarga din däresläre birergä, Ramazan ayında Täravih namazların kılırga häm törle mädäni programların (çaraların) uzdırırga kiräkle bulganı añlaşılgan. 1966 yılında ATTA Yönätem Korılı ber tawıştan Burlingamnıñ El Camino Real uramındagı binanı alırga karar birgän. Bu bina mahalläbezneñ böten teläklärenä turı kilmägängä binanı üzgärter öçen ber komitä korılgan.
Bu binanıñ yañartıp-tözätelüe öçen mähälläbez halkı üz köçenä genä ışangan. Yäşenä-kartına karamıyça, halennän kilgän här ir-keşe bu eşkä kereşkän. Mahalläneñ hatın-kızları da tämle Tatar aşları belän ozın eş könnärenä yäm birgännär. Ber yıl yarımda eşlänep betkän bu binada zur ciyılış bülmäse, ofis, mutfak häm ike bädräf bar.
Halkıbıznıñ tırışlıgı belän nihayät San Fransisko tiräsendäge Tatar oyışmasınıñ üz binası bulgan. Yıllar buyı bu binada sanap betkesez ciyılışlar, dini bäyrämlär häm mädäni programlar (çaralar) uzdırılgan.
